तू चांदणन्हाली अप्सरा

तू चांदणन्हाली अप्सरा
मी माती भरलं कोकरु
तुझं नि माझं कसं जुळावं
कसं व्हायचं सुरू .... गडे
तुरुरुरु तुरुरुरु,  तुरुरुरु तुरुरुरु .....?

तू कोकीळ, मी रेडा
मी चटणी, तू पेढा
जगरुढीचे दोन किनारे
मध्ये वाहाते सुसाट वारे
उडाण कशी मी भरु ?
कसं व्हायचं सुरू .... गडे
तुरुरुरु तुरुरुरु,  तुरुरुरु तुरुरुरु .....?

मी पाताळ, तू अंबर
तू नवनित, मी डांबर
इथे उगवतो पळस-धोतरा
तुझी आवडी जाई-मोगरा
मी सांग कसा विस्मरु
कसं व्हायचं सुरू .... गडे
तुरुरुरु तुरुरुरु,  तुरुरुरु तुरुरुरु .....?

तू इंडियाची राणी
मी भारतीय अज्ञानी
अभय उधळणे तुझे चौखूर
इथे चिंतेची सदैव टूरटूर
दरी कशी मी भरू ?
कसं व्हायचं सुरू .... गडे
तुरुरुरु तुरुरुरु,  तुरुरुरु तुरुरुरु .....?

                    - गंगाधर मुटे 'अभय'
~~~~~~~~~~~~~~~~~~~~~~~~