घुंगराची धून

घुंगराची धून

पहाटेचा शुक्रतारा । आला सनई घेऊन ।
विनवितो जित्रूपाला । द्यावी घुंगराची धून ॥

तुझ्या घुंगराचा नाद । म्हणे नादवतो मला ।
असा सूरमयी सुर । सर नाही सनईला ॥

तुझ्या कष्टाची कहानी । कधी घुंगरू सांगते ।
तुझ्या वेदनांची गाथा । माझ्या हृदयी गोंदते ॥

सारे जग झोपलेले । मीच एकटा जागतो ।
फ़क्त साथ घुंगराचा । माझ्या जीवाला वाटतो ॥

पहाटेच्या प्रहराला । लय घुमते निराळी ।
जागविण्याला सुर्याला । जणू ऐकवी भुपाळी ॥

- आ. बा. पाटील