अनुभवांची शिदोरी आणि सृजनशीलतेची समृद्धी

अनुभवांची शिदोरी आणि सृजनशीलतेची समृद्धी

इतका सुंदर आणि वैविध्यतेने नटलेला ’ओला’मेवा प्रकाशित करीत असल्याबद्दल प्रथम धन्यवाद. मुटे यांच्या निसर्गप्रेमावरील कविता छान असायच्या. त्यात अजून भर घालून त्यांनी देशप्रेम,वस्तुस्थिती,सामाजिक असे वेगवेगळे विषय हाताळले आहेत. गंमत म्हणजे निव्वळ लिहायचे म्हणुन त्यांनी लिहिले नसून ते अंतर्मनाने लिहिले गेले आहे. त्यांच्याबद्दल मला विशेष आदर आहे, तो यासाठी की ते खूप विनम्र आणि प्रांजळ आहेत. काव्य या प्रकाराचा ते आदर करतात आणि त्याविषयी आपले मत प्रदर्शनही करतात.

या संग्रहातील "घायाळ पाखरास" “आईचं छप्पर” आणि "हवी कशाला मग तलवार" हे मला विशेष आवडले.

त्यांच्या विडंबन काव्यशैलीबद्दल काय बोलावे? विडंबनकाव्य किती सरस लिहिले जावू शकते, हे त्यांच्याकडूनच शिकावे.

मुटेजी अगदी सहज कवितेतून गझल या प्रांतात शिरले आणि चक्क राज्य करू लागले! हे सर्व पाहता त्यांच्याकडे अनुभवांची शिदोरी आणि सृजनशीलतेची समृद्धी किती आहे हे समजते. अशीच त्यांनी साहित्यात समृद्ध भर घालावी अशी सदिच्छा.

अलका काटदरे
मुंबई
..............................................................................................